2020 թ. մարտից սկսած, երբ Հայաստանում և Արցախում սկսեց տարածվել համաճարակը և կրթական կառույցները անցում կատարեցին հեռավար կրթության, EduArmenia -ի համահիմնադիրները որոշեցին իրականացնել հեռավար վերապատրաստումներ՝ հայ ուսուցիչներին հնարավորություն տալով ծանոթանալու հեռավար կրթության մոտեցումներին, մեթոդներին:

Մարտ ամսից մինչ օրս EduArmenia փորձագիտական դպրոցի հարթակում անց են կացվել ավելի քան 100 վերապատրաստում կրթության վերաբերյալ տարբեր թեմաներով՝ հեռավար կրթության գործիքներ (Zoom, Microsoft Teams, Learning Apps և այլն ), հեռավար կրթության մեթոդներ (Flipped classroom և այլն), 21-րդ դարի կրթական մարտահրավերները, հաղթահարման ուղիները և այլն: Վերապատրաստումներին մասնակցել են ավելի քան 50 խոսնակ աշխարհի տարբեր երկրներից, վերապատրաստման լսարանը ներառել է մոտ 10․000 մարդ: Այս վերապատրաստումներին կարելի է ծանոթանալ EduArmenia -ի Յութուբյան էջում

Վերապատրաստումների երկրորդ ուղղությունը երկարաժամկետ ծրագրերն են: Դրանցից է «Կրթության նորարար մեթոդները» ծրագիրը, որը իրականացրեց կանադահայ Իրինա Ղազազյանը: Ծրագիրը տևեց չորս ամիս, և 60 հայ ուսուցիչ այս ծրագրի շրջանակներում ծանոթացան կրթության նորարար մեթոդների հետ:

Երկարաժամկետ ծրագրերից էր «Կրթության կազմակերպում և կառավարում» ծրագիրը, որը իրականացրեցին համահիմնադիրները: Այս ծրագիրը տևեց երկու ամիս, և վերապատրաստման 12 մասնակիցները՝ տնօրեններ, ուսմասվարներ, ծանոթացան կառավարման համակարգերի նոր մոդելների, միջազգային կրթական որոշ չափորոշիչների և կրթության արդյունավետ կազմակերպում և կառավարում իրականացնող կազմակերպությունների փորձի հետ:

Վերապատրաստումների գաղափարները ավելի կիրառելի և շոշափելի դարձնելու համար համահիմնադիրները սկսեցին նաև հայ ուսուցիչների վերապատրաստման մի նոր ուղղություն՝ համատեղ պլանավորումների շարք: Համատեղ պլանավորում- վերապատրաստումները բաղկացած են երկու մասից՝ տեսական և գործնական: Տեսական մասում վերապատրաստում անցկացնողները ներկայացնում են կրթական որևէ նորարարական տեսություն, իսկ երկրորդ մասում՝ վերապատրաստման մասնակիցների հետ միասին համատեղ պլանավորում և կիրառության դաշտ տանում տեսական գիտելիքները՝ ստեղծելով համագործակցային աշխատանքի արդյունքում ստեղծված արտադրանք: Նման ճանապարհով արդեն ներկայացվել և համատեղ օգտագործաման ուսումնական պլան է ստեղծվել հետևյալ թեմաների վերաբերյալ՝ հասկացությունները ուսումնառության ընթացքում, կոմպետենցիաների կիրառումը կրթության մեջ և այլն: